Juknis Lomba Baca Geguritan Virtual (Nasional)
WONG
JAWA
Suripan Sadi Hutomo
Wong Jawa aja jawal
Jawa jawal Jawane kadhal
Apa sliramu Jawa, mitraku
Geneya kok-ngiris atiku?
Ronggowarsito lan Aristoteles
Yosodipuro lan Sokrates
Padha dene pujangga linuhung
Padha dene pujangga kanga gung
Yen kok semak buku filsafat
Yen kok semak ilmu masyarakat
Mung ana siji keblat
Kang ajine ora mekakat
Kang gawe ati nggrantes
Awit mung Aristoteles lan Sokrates
Sinebut sinobya ukara
Rinoncen kembang maneka
O, Ronggowarsita
O, Ya Sadipura
Awit apa basa Jawa
Kang ora bisa diwaca?
Awit apa mung basa latin
Kang bisa anuntun batin?
Wong Jawa aja jawal
Jawa jawal Jawane kadhal
Apa sliramu Jawa, mitraku?
Geneya kok ngiris atiku?
Kecubung ungu ing taman kutha
Iki kahanan kang nembe teka
Apa sliramu bakal wuda
Melu-melu angumbar dhadha?
Wiwawite lesbadhonge
Tabik-tabik sunan kali
Kita ngadeg ing grumbul srengenge
Kita wani ndhudhah ati
Sumber: Jaya Baya (12 Maret 1972)
UDAN
R. Giryadi
udan riwis-riwis iku nggawa ati atis
aku ing kene ijen nyawang mega klawu
ora ana kluwung agegambar ing ati
ati kang wus sakala suwe garing aking
ora nate ketaman banyu kang ngucur
saka padusan. padusan kang tumetes
saka luhku dhewe.
udan riwis-riwis iki nggawa kumandange
ati kang ra wis-wis pingin asesujud marang
kang maha sujud.
ning krentege ati kaya klawune mega
ora isa tinebak. ora isa dadi putih
memplak
memplake langit kang ambane sak olap-olap.
udan riwis-riwis iki ora wis-wis
agawe ati atis. ati kang nora tumitis
ngerti pambisike hawa adem
kang mok sebulake saka
dunga rina-wengi, gur kanggo awaku
kang ndhepipis ing pinggire grimis.
Surabaya, pinggire grimis ing wanci awan,
2014
KENJERAN
R. Giryadi
kenjeran ing isuk iki tak anti kabarmu
kang tumeka saka watesing panyawang
panyawang kang lamur lamun urip winates
pantes
murih gung ing kang maha umur.
kenjeran ing isuk iki
ing gisik iki aku nratas dalan lawas
kang ngerak jruning wedhi asin
ana tracak karipta lamuk lamuk:
ora kawaca ning mandhes ing jaja.
kenjeran ing isuk iki
kabarmu kang tak anti saka watesing
panyawang
tumumpang prahu cilik uglak-uglik
krana ombak nyempyak-nyempyak
nggawa usada, usadaning asin anyepe urip.
kenjeran ing isuk iki
prahumu isih kaya wingi uni
nunggu miyake langit ngawa angin silir
silir
sowan kang maha sihir.
Surabaya, kenjeran rikala isuk sakdurunge
njuri nulis cerpen, 2014
KELUD
R. Giryadi
rikala aku sambang awakmu
ana tracak kang gumelar dawa
sak dawane lurung ing desa iki
lurung iki kaya tetembangan
aku rerengengan lumantar
angin silir-silir ngumbar warta
ing gunung iki
gunung kang kebak wadi
aku nyoba nyenyuwun
ing gelaran tracak kang gudras
kringet. kringet kang durung
atus sak dawane lakon
lakon sing marake ati ketaton.
wis-wis..
aku ora bisa nerusake laku
lakuku kepranggul watu gunung
sikilku gruyak-gruyuk
napaki undak-undakan urip
urip kang kepara ngrangas
:sepi lan kebrangas.
kilisuci, panyuwunku
dadekna sumur iku
sumur kang agung
sumur kang ora kebrangas
ganas
sumur kang entuk paelu
gawe mbasuh lara brantaku.
Kediri, rikala munggah Kelud, seminggu
Sawuse njeblug, 2014
KRETEG
R. Giryadi
kreteg uglak-uglik iki tak sabrangi
ing pucuke tumata aksara
kang durung kawaca
durung karipta
aku kepingin sanja
kreteg uglak-uglik iki nuntun aku
nratas dalan-dalan
kang kebak pitakon
iku tanda aksara apa?
kreteg iki ora sumaur
lakuku kepontang panting
pucuke kreteg sansaya muthit.
iki sapa kang aripta?
sikilku groyok. awakku oleng
ara ana pinyauran.
kreteg kang tak liwati iki
mbideg njegideg.
: atiku trataban
eling samubarang
eling dedosan kang
nyrimpeti lelakon iki
kreteg iki. kreteg uglak-uglik
ngelikake patrabe lelakon
kang terus mbuntuti lelakune
urip.
urip kang winates. urip kang
ora bakal mbalik mburi
urip kang wani ora wani
kudu nyebrangi kreteg
uglak-uglik iki.
Kediri, rikala sambang gunung Kelud, 2014
Silahkan isi biodata berikut:
https://forms.gle/JFJdtA9VftrrzjgF7
Komentar
Posting Komentar